Uas fodices an Mirandés

25
Jan 08

Nun bos tengo cuntado de la mie bida, mas ten sido por ua rezon buona, que stá eiqui an riba bien a la bista. Buono, nun stá assi muito a la bista, mas you tamien nun la muostro assi mi çtapada, que nun querie que quedássades pori mei einougados.
Pus nun quereis saber que este caralho deste stojico se me metiu eiqui an casa i nun habie maneira de la botar deiqui para fuora!?
Al prancípio you inda le achei algua graça, muntada nuoba, scatrapolhaba bien (ou brincaba bien, para ousar las palabras de un amigo eiqui de la casa), diç que le gustaba muito l mirandés, que la ponie mie cachundica, tan cachonda que, quando you le dezie uas boubadas an mirandés, eilha quaije me refodie las oureilhas de tanto me las apertar cun ls quartos...i you tamien me daba un cachico la risa, que le achaba graça oubir l mirandés cun eco....mas, caralho, bós bien sabereis, mormiente ls que ambárcan nessas fodices de fidelidades (falando de foda, solo l jejun i la abstinença seran malinas más malas que la fidelidade), esses, anton, bien sabereis que quemer siempre refugado, por buona que seia la chicha, ye cousa anfartadiça.
I you yá andaba cunsemido! Nun le fiç niua pormessa a Nuossa Senhora de l Naso, mas anté peç que fui eilha que me oubiu, berdade seia dita que inda nunca me faltou, assi Eilha me perdone por le poner eiqui l nome, tamien, se fui capaç de me perdonar las façanhas que fiç trás daqueilhas carbalheiras, nun bai a ser agora que me ha de faltar.
L cierto ye que, cun ajuda de riba ou sien eilha, la chabasquita yá zaparciu deiqui. I lhebou trás deilha l caralho de ls palos de ancenço que tenie la manha de poner a arder pula casa toda, que era mi çançual, que diç que le dában buolta al miolho, a mi dában-me buolta a las tripas, caralho m'arrafoda, que inda se antrasgaba más l cheiro esse ne ls narizes que la muinha quando andaba al culo de la trilhadeira nas eiras de la mie tierra, percisar de l caralho de l cheiro a muortos para poner la rata als poulos, you cun l caralho de l cheiro esse tamien se me alhebantaba l palo, mas era por bias de me lhambrar de la missa de la mie tierra, i de l culo de Marie Delaide, que, de moça, se azinolhaba siempre a la mie frente i tenie las nalgas más redundicas que la merandeira que you lhebaba na fardela quando iba de buieiro.
Pus ye berdade!, hoije chego you a casa i staba, anton, eilha a salir, cun cara de quien le pica la cebada na barriga, que se iba ambora, para nun tornar....i inda tubo la çfaçateç de me slhadruzir antre dientes:
...alguém que me faça sentir uma verdadeira mulher, que tu...é assim... nem nunca sequer me levaste ao orgasmo!
Anquanto eilha fungaba camino de l eilebador, you inda le procurei - adonde?! - mas apuis cerrei la puorta, nun fura pori que le dira ua belharaça i zbirasse para trás.
C'un caralho! Que la faga santir ua berdadeira mulhier!...
You que yá la deixaba lhimpar la casa, que yá la deixaba fazer l quemer, que por dues ou trés bezes la deixei ber l canal de talbison que eilha querie anquanto you iba pa l café a ber la bola, que inda ua beç, nua biaige, buí dues minis, al balcon, afregulhado, anquanto eilha drumie un sonhico assado ne l banco de l carro, que inda esta purmanhana, antes de salir, le dixe para me passar a fierro las camisas brancas que yá stában lhabadas....que nun la fazie santir-se ua berdadeira mulhier!... Stá bien que nunca le cheguei a cunfiar la gabeta que eilhi tengo, la de las las meias mei zlidas ne ls carcanhales, que me las puntiara...mas, tamien, las cousas nun puodan ser assi a correr, cumo quien bai a apagar un fogo...you gustaba de la mocica i tenie respeito por eilha, i tanto tenie que yá habie mercado dous belhetes para la bola de Demingo, fazie tançon de la deixar ir cumigo al futebol, se isso nun ye tener respeito, anton nun sei l que ye...
I que nunca la lhebei al ourgasmo?!
Ora foda-se!, you nun sou bruxo, stá un home sujeito a cada ua!... You que la lhebaba cumigo para quaije todo l lhado, que la lhebaba al cinema (yá nun era sien tempo que you me strenaba nun filme de l Manuol de Oulibeira, quedei bien squermantado, nun me tórnan alhá a acaçar, nien de pormessa para l benfica ser campeon), que la lhebaba a la çcoteca, al restourante, a las çpoziçones, a las barnissaiges, al caralho más bielho...tanta tardica passada de la çapatarie para la tenda de ls farrapos, a zbirar, a zanrebulhar, a spurmantar eiqui i eilhi para apuis nun mercar nada... i al fin de cuntas inda ten un home que oubir que nunca la lhebei al ourgasmo!...
I cumo caralho iba you a adebinar que eilha querie ir a la tal fodice de l ourgasmo!?
Habie de quedar por bun preço l belhete para antrar, cun nome assi strangeiro i todo!...
publicado por poucabergonha às 00:47
tags:

73 comentários:
Cuitada de la rapaza!...
Bien zbalida irie...
Almendra a 25 de Janeiro de 2008 às 23:55

« Barnissaiges » : que lhéngua ye essa ?
Francés ?!!!
Un francés que daprendiu ne ls « BAR… nissaiges », bebendo ua cerbejica tamien, ou an tabernas mirandesas que yá nun eisísten ?
Que todos saiban : esse francés que fala ye un francés mui, mui CUL…TO !
Fale mais anton i splique-mos tamien porque ye que nun fui capaç d’ansinar « la chabasquita » a dezir l quier que fusse an mirandés, eilha que chegou a dezir que « le gustaba muito l mirandés »?
Ancumpeténcia de la sue parte ?
Nun bonda anton passar l tiempo a dezir fodices por ende, mesmo an mirandés !
Todo ten un précio ! Até la anteligéncia !
ana a 26 de Janeiro de 2008 às 23:31

Biba Almendra!

Yá muito tiempo que nun deixabas rastro porqui...cuidei que yá te habies einojado de las mies panteminadas!
Inda bien que assi nun fui, buolbe siempre i trai que cuntar!
Abraço
poucabergonha a 27 de Janeiro de 2008 às 15:32

Biba Ana!

Beio cun agrado que cuntinuais besita desta mie casa tan houmilde...
Solo nun sou capaç de ancuntrar palabras para bos agardecer todos ls cuidados i preocupaçones que teneis cumigo, i la admiraçon que teneis pul miu modo de biber!
Abraço
poucabergonha a 27 de Janeiro de 2008 às 15:39

Essa sue casa para mi ye cumo un tubo de ansaio : obserbo, analizo i depuis despejo todo ne ls sgotos.
Admiraçon pul sou modo de bibir (i nó biber, tome nota !) ?!!!
Ye cumo se quedasse admirada delantre dun cagalhon de merda ou duas moncas de l nariç !
Mas cuntine cun todas essas sues eilusones…
i coma refogado… refogado todo ls dies !
ana a 27 de Janeiro de 2008 às 21:03

... todos ls dies !
ana a 27 de Janeiro de 2008 às 21:05

I dezir que nun me zlhargais la carcielha!...
...de tanto ateimar, inda me habeis de fazer Çpejar (apuntai ne l buosso cadernico que nun hai "des" an ampeço de palabra ne l Mirandés)l lheite todo de ua beç!
poucabergonha a 27 de Janeiro de 2008 às 22:39

... Deite !
ana a 27 de Janeiro de 2008 às 22:49

De beç an quando alhá bou dando ua spreitadela, ne ls testos i ne ls quementairos.
Essa de Amadeu subre l brincar, ye mui usada la palabra.
You siempre oubi dezir qua ua rapaza, dessas que l gústa la cousa, que era un brincote.
I quando se lhebaba la burra al cabalho, a las bezes salie ua mula pimpona i dezien: " bés, i solo l dou un brinco".
Tamien dezien que las burras quando andában salidas, que tenien las narizes mi abiertas.
Para screbir mirandés ten que se saber la filosofie de l praino i la psicologie de la sue giente i tu si que tenes esso todo.
Yá nun sós burro de apouco.

Abraço
Almendra a 28 de Janeiro de 2008 às 00:09

I you quando dou spreitadelas, çcubro que se scríben aqui grandes burriquices.
Todos saberan l que bal Almendra, até para la posteridade (Porque tamien ye esso que quier, nun ye ?)
Essa filosofie de l praino i psicologie de la sue giente que pretende defender nun puode ser outra cousa senó ua bison facista de la realidade. Cuntine que l praino bai a ganhar muito cun essa sue bison retrógrada, machista i buona, essa tamien, para çpejar als sgotos.
Biba i queden aqui nesta merda ad aeternam!
ana a 28 de Janeiro de 2008 às 00:37

Janeiro 2008
Dom
Seg
Ter
Qua
Qui
Sex
Sab

1
2
3
4
5

6
7
8
9
10
11
12

13
14
15
16
17
18
19

20
21
22
23
24
26

27
28
29
30
31


arquivos
mais sobre mim
pesquisar neste blog
 
Subscrever por e-mail

A subscrição é anónima e gera, no máximo, um e-mail por dia.

blogs SAPO