Uas fodices an Mirandés

03
Jul 08



Ora eiqui stamos nós outra beç!... para cuntinar adonde habiemos quedado!!
Que çcaradote! - pensais bós a angurriar la tiesta - çpide-se an lhatin i zaparece ua porrada de dies... i apuis torna de manos lhabadas cumo se nun fura nada cun el... que poucabergonha!
I ye bien pensado... mas i anton adonde stá la nobidade?! Ou apuis de tanto tiempo a ler la mie filosofie, inda nun stabades capacitados que you sou marca caralho, sien respeito por nada nien por naide, capaç de la pregar nun sfregante, mal acace un de cuostas.
Bah, sós un merdas, nun sós firme nas puxadas, nun sirbes para nada, nun se pode cunfiar! - arrematais bós la cousa, cun tançones de bos ir daqui para nunca más tornar.
I teneis muita rezon, mas tamien podeis quedar a saber que nun sodes ls purmeiros a botar essa santença. Yá muita galdrapa se fui deiqui rezungando, que you isto, que you aquilho, que nun sei que más, que you inda era más baixico que l puolo de la rue... i you quedo siempre cuntento, quando se ban assi, a poner-me de filha de la puta para baixo, ye seinha que quando - i se - you quejir, cun ua çculpa más buona ou más roin, debrebe se me tórnan a meter ambaixo. Para ls que quieren daprander, inda bos digo que las çculpas cun porblemas de família ou de denheiro nunca fálhan. Milagre! Home, eilhas, mesmo que nun le cunféssen, stan siempre a pansar an casamiento, i ber un assi a dar-le amportança a la família i al denheiro adoça-les la boca. Tunticas.
Buono, isso agora nun amporta, bah, l que cunta ye que stamos eiqui outra beç capazes de rachar ua peinha, i yá sabeis, isto eiqui ye cumo dezie tiu Artúrio quando le procurou a la tie se se querie casar cun el: bah, se tu nun quieres, stá la outra a la spera.
Queda eiqui un oubrigado i un abraço para todos ls que deixórun quemantairos animadores ou de cuidados pula mie salude - que you bien sei que fúrun santidos, i you tamien ls stimei. Dius bos ls pague i bos déia ua moça buona!
I tamien queda la pormessa de qualquiera die bos cuntar la rezon para l miu semiço, que isto tamien nun fui solo l caralho de la mándria (foda-se peç que stou meio amolhecido, quaije me iba squecindo de scaralhar a la farta, inda pori habeis de pansar que la buona bida me puso mei'apanascado), quedais yá a saber que me passou buona, mas solo bos lo cunto apuis, que hoije yá nun hai bagar.
Bedes?, bós bien purmetistes que nun tornábades eiqui, que esta merda nun balie la pena, más burro era quien perdie tiempo a ler esta fodice... mas agora yá quedais cun l ferrico de saber anton que caralhos me haberie passado, i até bos habeis de ampurrar a ber quien antra eiqui purmeiro. I sodes siempre bien benidos, isso yá l sabeis.
Bah, i cumo you sei que sodes mius amigos, tamien inda bos deixo un zenhico eiqui anriba (anriba, caralho, nun ye anraba, yá bistes la fodice, se un nun stá cun atento l que le puode passar, las cunfusones que se árman), un zenhico assi solo a pormeter, tamien bós para que queriedes la tie toda çpida, que graça mete essa merda, digo-bos-lo you que yá stou bien squermantado, las más de las ties son más angraçadas bestidas do que çpidas, si, dan más teson cun l que porméten do que apuis cun l que dan... i anton alguas apuis quando se abáixan de las cholas... ah Dius te lhibre, ye cumo haber cebado i nun tener buntade de matar, mas isso agora queda para más tarde, bah, bamos a cerrar la puorta i a apagar la lhuç, que apuis a las scuras, las ties ye cumo se fúran botas de la tropa: márchan todas!
publicado por poucabergonha às 02:27
tags:

6 comentários:
Buonas nuites, Tiu de la Gaita,

Si sou l purmeiro ne l comentairo. Cumo passei - you todas las nuites fago la ronda por todas las rues i caleijas i currales - i nun bi carreira a la buossa puorta, aporbeitei i antrei senó fazie-se-me tarde.
Bá, ye solo para picar l punto i bos dar las buonas benidas. L que mais me acupaba la cabeça era que mos zafazíssemos sin bós, mas nun hai meia. Assi yá quedo çcansado.
Até parece que sodes cumo l criados de antigamente, que s'apreitában l die de San Pedro: zaparcistes, mas yá achestes quien bos deia la códia adonde comer, que ls tiempos stan malos. Bendo bien, todo depende de la códia que fur i de l amo ou ama que bos haia apreitado. You bien sei que me ides a dezir que nun teneis amo, mas esso ye algo que stá por probar.
Buonas gaitadas,
Amadeu
Amadeu a 4 de Julho de 2008 às 01:32

A caralho, you lhougo bi que esta fodice yá cuntinaba outra beç!...
L miu yá uns dies que andaba mais atibo.
Mas inda bien que you yá andaba a pensar an le cumprar uns cumpremidos desses azules.

Nun steias tanto tiempo parado, que you yá andaba cun malos pensares.

Felorinda
Felorinda a 6 de Julho de 2008 às 10:57

Buonas tardes a quien stá!

Lhougo se bei quien ye amigo, que cuntento quedo an bos ber porqui outra beç!
Ah Amadeu, you si tengo que bos dezir que nun tengo amo niun... mas tengo amas... i nun son poucas. L mal, ó l bien, ye que nun sou capaç de m'aguantar cun la mesma de san Pedro a San Pedro... i mirai que nun ye por nun me dáren bun trato. Bendo bien, you quedo tan pouco cun cada ama, que a las bezes deito-me cun ua (pimpona) i alhebanto-me cun outra (un stafermo) que nisquiera parece la mesma, calhando ye de la borracheira yá ir passada. Peç-me que isto anté puode ser assunto para un scrito, que ten muito que dezir.
Bah, un abraço i tornai siempre a esta buossa casa!
I bós, ah Felorinda!
Quedo cuntento por ber que inda bos poupei l denheirico de ls cumpremidos azules... que me béngan agora a acusar de ser un corrécio, stando assi a ajudar a la felcidade de un matrimónio tan eisemplar cumo l buosso.
Tornai siempre.. i trazei l buosso home, que yá sabeis que eiqui nun l lhebamos para malos caminos.
De l denheirico que el ponir neste banco, bós bien sabeis que bós ye que le gozais ls juros... assi bos présten bien!
poucabergonha a 8 de Julho de 2008 às 18:02

Arre caralho home ! Caralho sta rafoda cum dezie tie Lhuzie que Dius tenga ... mas tu, tu adonde te metiste ?

Pensei que ya te l'habien curtado (nun falo nien de la lhiengua, nien de las manos i inda menos de los pies !)

Bota ende uas arrespinchadelas !
Tiégui a 11 de Julho de 2008 às 19:04

Mira mas ua cousa... al Tragu d'Areces bieno-mos soutrodie cun ua buona. Diç qu'inda nun hai un film dessas de rapazas a fazer cousas an Sturiano. You bien l dixe que mos manda parqui uas Sturianas que nos ya tratabamos disso.
Mas acho que l'eideia nun l gustou assi muito. Tu haber s'al dizes algo... mira eiqui : http://trasgu.nireblog.com/post/2008/07/10/llingua-gochona
Tiégui a 11 de Julho de 2008 às 19:12

Biba, Tiégui, buonas nuites!

Quien ye bibo siempre aparece!
Sós terrible, home! Stá bien anjorcada essa de ls lhioneses!
Home, se quejires ampeçar a purparar la cousa an Mirandés, manda-me uns microfones eiqui para casa, i yá quedamos cun grabaçones para ua porrada de metros de filme!
Era un poulo bien grande para la cultura mirandesa, isso era!
Abraço
poucabergonha a 19 de Julho de 2008 às 03:42

Julho 2008
Dom
Seg
Ter
Qua
Qui
Sex
Sab

1
2
3
4
5

6
7
8
9
10
11
12

13
14
15
16
17
18

20
21
22
23
24
25
26

27
28
29
30
31


arquivos
mais sobre mim
pesquisar neste blog
 
Subscrever por e-mail

A subscrição é anónima e gera, no máximo, um e-mail por dia.

blogs SAPO