Uas fodices an Mirandés

23
Dez 07



Hoije quiero-bos falar de ua lheira adonde se fáien mi buonas colheitas. You chamo-les las ratas de biblioteca, mas la nomeada que más bezes tengo oubido dar-le ye “las antelectuales”, seia lá l que fur que essa fodice querga dezir.
Ye papa fina, mas nun ye para un qualquiera, nien bai assi a la purmeira, ten que se star mi squermantado. Assi i todo, a ber se bos dou dues palabras i quedais un cachico más andustriados.
Para dar cun ua rata de biblioteca ten que se tener l uolho spurmantado, nun seia pori que un se anganhe i apuis ye ua fodice.
Hai dous tipos: uas bísten-se de ua maneira çcuidada, buono, que quier parecer çcuidada, “négligé” para ousar la palabra de la última que se me metiu ambaixo, mas que, an berdade, de çcuidado nun ten nada. I tanto nun ten nada que muitas bezes son eilhar mesmas que fáien la roupa – porque nun ancóntran nada ne ls sotos que puoda spelhar la sue personalidade, raistaparta, chabascas de l caralho, buona personalidade ten la burra de tiu Chuché, mas ye ambaixo de l rabo!... .
L pelo ye cumprido i anda siempre çpeinado – l que tamien debe dar buono trabalho – i muitas bezes ben-se-le para la frente de ls narizes i de ls uolhos. Ora, que las melenas se les antrásguen ne l garfo quando stan a quemer, bá que nun bá...agora que, quando ténen la boca acupada cun outras cousas que nó l quemer, inda tenga un que les star a zbiar las guedeilhas, nun seia pori que se atafánhen cun un manhuço de pelos, isso ye que nun ye serbiço!...
You, por mi, gusta-me pansar an la bida, botar-le las cuntas al futebol, cismar assi an cousas amportantes, anquanto me stan a sticar las pieles i a bufar als guebos. De maneira que se un ten de star cun atento a zbiar las cerdas de la rapaza, nun seia pori que le fágan un lanho na cabeça de l bergalho, yá stá todo fodido i yá nisquiera sabe cumo habie de ser.
Buono, ándan anton assi cun ua farpela lharga i mal amanhada (que quier parecer mal amanhada, yá bimos), l pelo delantre de ls uolhos, ténen ua araije, assi, peç que mei de quien bai a resolber ls porblemas de la fame de l mundo, cumo se este juntouro de tunticos que andamos ne l nible abaixo deilhas nun fura capaç de antander las “sutilezas de ls sous ancimesmamientos”. Cumo an berdade nun somos, al menos you, mas isso queda para ua liçon más abançada.
Abiso-bos yá que muitas deilhas ténen ua relaçon mui difícele cun l’auga i cun l xabon, you cumo ando siempre meio custipado nun se me amporta, mas quien fur más asqueroso ye melhor tener cuidado.
Tamien nun hai maneira de saber se la muntada bal la pena ou nó (la roupa ye tan lharga que solo a palpite), mas, de regra, mesmo que nun téngan l lhombo i las nalgas mi bien amanhados, nunca ye tiempo mal ampregue. Ye que cumo mui ralamiente l spurmientan de giente (ls amigos tamien son “antelectuales” i nun le bótan muita fé als prazeres carnales, ténan cunsemiçones más eilebadas), las ganas de lhebar uas baradas son tantas que queda ua cousa pul’outra. Bonda apuntar bien la purmeira pina, i apuis ye cumo se l ambierno fura eiterno...nunca más quieren zancabar la marreta.
Se stubíren na rue ou ne l café nun hai que anganhar. Ténen un libro nas manos, se fur ne l café ye até possible que l stéian a ler i a sublinhá-lo cun un lápeç. Atençon, reparo mi amportante. Se l libro fur un best seller, zbiai la mira par’outro lhado que la peça ye falsa.
Caralho!, por falar an libro!
Inda tengo que le botar ls uolhos pul que me deixou acá la “Paty”, ua destas tales (iba-me squecendo de bos dezir que les gusta que las tráten todas assi por estes nomes peç que meio de perro).
Deixa anton l libro i diç que apuis me procura que tal. Pus claro que you le dixe que si l querie ler, que nun querie outra cousa, que yá muito tiempo que andaba a saber dua cousa assi. Fintou-se, la tuntica.
Foda-se!, 420 páginas, screbidas pur un tiu dinamarqués, la dialética nun sei de quei! Nun se fodie eilha que you l lira.
Bai cun la finta de siempre. Bengo eiqui a la anternete (mal será que nun dígan algo subre l home), leio l resumo de las cuostas de l libro, dues ou trés frases de l meio para me calçar bien, i ala, stou purparado para dar ua cunferença subre l tal.
Quando me procurar que tal, you “anquietante”, “ua scrita anleante” i mas dous ou trés “...antes” i yá stá. Se bir que puodo sbarar, cumparo-lo cun outro outor de la dinamarca (ambantado, stá buono de ber), que scribe subre la “insustentabilidade dos prazeres carnais”, apuis, por falar an prazeres carnales, cousa i tal, dou-le dues ou trés spechocadas, mal será que nun se le squeça de l caralho de l libro.
La nuossa cumbersa ye que bai a tener que quedar para manhana ou passado, seia esse l más grande perjuízo, antes isso que cobrar ua pierna ou pori pisar na buosta de ua baca...
publicado por poucabergonha às 02:26
tags:

5 comentários:
Buonas nuites Tiu de la Gaita,

Pus agora si que m'amolestes, que la scrita stá a quedar dua filosofie mui alta, l que a mi lhougo me cheirou quando bi la rapaza na scalada a saber de ls lhibros. Pus stá mui bien.
Solo bos querie pedir un fabor, ye
que fáledes de ls ratos de bibloteca. You bien sei que nun ténen acumparança culas ratas de bibloteca, i son mais xatos que you sei alhá, mas talbeç seia por esso que hai por ende las ratas de la bibloteca. Mas nun ligueis muito a la mie filosofie, que ye mui rastreira.

Querie-bos pedir outorizaçon para poner un reclame de l buosso blogue ne l blogue «froles mirandesas». Bós quei me dezis? Se calha hai giente que nun bai a gustar, mas pronto, you tamien drumo para esse lhado, até porque la bida ten muito lhado i se un nun se afaç a drumir para todos passa sonheiras de meia nuite. Mas l buosso blogue ten que ser coincido porque stá mui bien screbido (çculpai - que bos digo esto que ye ua manha mie i nó por querer bos mal -, mas neste redadeiro testo deixestes scapar uns eirricos - cousicas sien amportança, que a mi tamien se me scápan -, i bei-se bien que fui la priessa).

Un bun natal, Tiu de la Gaita, i un anho de 2008 cun muita anspiraçon para cuntinar a screbir.

Amadeu Ferreira
AF a 24 de Dezembro de 2007 às 01:34

Buonas nuites Amadeu Ferreira!

Quedo mui cuntento cun la buossa besita, mas çculpai que ampece por bos zmintir, la filosofie porqui nun anda nada alta. Alto eiqui solo las nalgas de la chabasca de l retrato...nien outra cousa hai que asperar, la purmessa fui de andar a la altura de l balcon de las tabernas!

Inda tengo que bos redrobar las çculpas pur nun me parecer que baia a falar de ls ratos de biblioteca, nó que nun me gústen - you mesmo tengo muitos amigos desses - mas ye que sabeis? çanfonas puode haber porqui ua xaranga deilhas, mas gaitas chega bien la mie, assi Dius me deia salude i fuorça na dita!

Agora de l reclame ne l Froles Mirandesas parqui: Home, isso nien percisais de pedir l outerizaçon, botai-le cun fuorça que ye anté un fabor que me fazeis. You bien sei que , por eisemplo, las tales "antelectuales" les gusta muito saber de l Mirandés, que ye muito "giro" i tal. Cumo alguma se spipe de las Froles parqui, apuis de l "giro" trato you, muita yá me passou por baixo a la cunta de l Mirandés, nien you ando eiqui a gastar l miu "lhatin" a pansar noutra cousa!

You tamien bos quiero desear un bun Natal i un Anho Nuobo cheno de todo l que más deseardes.
L Tiu de la Gaita

A ber, anton, se dou cuns ls erros, tamien, carai, nun hai un gusto purfeito an la bida, por un lhado tener besitas amportantes, por outro quedar lhougo sujeito a que se me beia la fralda de fuora...;)
poucabergonha a 24 de Dezembro de 2007 às 02:47

You, pur mi, gusto de uas buonas bolcadelas na cama cun quien se puda falar un cachico ne l fin (i antes, claro), i de algo de jeito, mas cumo quiera ua rata dessas tenerá cunbersas a mais sobre teorias de cuordas, fotones i cousas que tales
Mas agrada-me esse culico a sticar-se pals libros!
manel a 26 de Dezembro de 2007 às 01:30

Biba Manel,

I a quien nun le agrada?!...l que ye doce nunca amargou!
Nun cuncordo cuntigo subre l paleio antes i apuis la funçon. You stou cumo diç l outro "las ties ye cumo las garrafas de bino, deitadas, nun sítio scuro, i se possible cun ua rolha na boca!..."
Abraço
poucabergonha a 27 de Dezembro de 2007 às 01:12

Ah no ! You perfiro al lhibro qu'eilha ten ne la sue mano... da pra ler al titelo..."Flores Mirandezas"... ai ai s'ele l soubissa !
Tiégui a 16 de Janeiro de 2008 às 19:06

Dezembro 2007
Dom
Seg
Ter
Qua
Qui
Sex
Sab

1

2
3
4
5
6
7
8

9
10
11
12
13
14
15

16
17
18
19
20
21
22

25
26
27
29

30


arquivos
mais sobre mim
pesquisar neste blog
 
Subscrever por e-mail

A subscrição é anónima e gera, no máximo, um e-mail por dia.

blogs SAPO